Këngëtarja shqiptare me famë botërore, Rita Ora, ka ndarë me ndjekësit e saj në Instagram një video të nënës së saj, Vera Sahatçiu-Ora, e cila u bën thirrje qytetarëve të Kosovës që të marrin pjesë në zgjedhje.
Vera Sahatçiu-Ora, e cila është psikiatre me profesion, e publikoi fillimisht videon në llogarinë e saj personale, ndërsa Rita e shpërndau më pas në një audiencë shumë më të gjerë, duke përçuar mesazhin për rëndësinë e votës.
Në video, nëna e artistes shprehet:
“Të dashur bashkatdhetarë, duhet të jemi të lumtur që kemi mundësinë të votojmë për të ardhmen e shtetit tonë dhe për të mirën e vendit tonë. Votoni për përcaktimet tuaja, duke shpresuar që premtimet e fushatës të realizohen. Me fat, Kosovë!”
Përmes kësaj thirrjeje publike, Vera Sahatçiu-Ora dhe Rita Ora inkurajojnë qytetarët e Kosovës të ushtrojnë të drejtën e tyre demokratike dhe të marrin pjesë aktive në vendimmarrjen për të ardhmen e vendit.
