Këngëtarja shqiptare Ronela Hajati ka reaguar me forcë ndaj komenteve negative që ka marrë për pamjen fizike dhe muzikën që bën. Në një postim në rrjetet sociale, Ronela shprehu pakënaqësinë e saj ndaj atyre që e kritikojnë dhe bëri thirrje për t’u fokusuar në gjëra më të dobishme.

“Kush ulet dhe komenton, harxhon kohë që mund ta shfrytëzojë për të punuar e për t’i çuar bukë në shtëpi familjes,” tha ajo, duke i kritikuar ata që e komentojnë për peshën dhe veshjet e saj. Ronela i quajti këto komente si të pakuptimta dhe shtoi se ndjekësit që e kritikojnë “rrezikojnë të parazitojnë gjithë ditën.”

Ajo gjithashtu adresoi komentet për muzikën e saj: “Nëse nuk e pëlqen muzikën time, mos e dëgjo!” Duke u shprehur me ironi për komentet që merr për pamjen e saj në jetën reale, Ronela theksoi: “Ju lutem mos më thoni më: ‘Ronela qenke më e dobët live’, se është fjalia më e shpëlarë që më zënë veshët. Kam pasqyrë!”

Në përfundim, Ronela falënderoi ata që e kanë mbështetur gjatë karrierës së saj dhe u shprehu dashuri fansave të saj të vërtetë: “Të gjithë atyre që i kanë mbushur koncertet dhe zemrën time plot me dashuri, ju kam shumë xhan! Ju tjerëve, ishalla po keni punë!”