Deputetja e Partisë Demokratike, Elda Hoti, në fjalën e saj në Kuvend replikoi me ministren e Infrastrukturës, Belinda Balluku, duke ngritur akuza të forta për abuzim me projektin e rrugës Thumanë-Kashar. Sipas Hotit, ky projekt është shndërruar në një aferë të hapur korrupsioni, ku ka pasur ndryshime të dyshimta për interes të oligarkëve të lidhur me qeverinë.

“Projekti fillestar i rrugës Thumanë-Kashar u ndryshua. Në projektin origjinal kishte nyje në Thumanë, por ju e ndryshuat për llogari të një oligarku. Bllokimi i aksesit të aksit të vjetër është një veprim kriminal,” deklaroi Hoti.

Ajo vazhdoi duke e cilësuar këtë projekt si një “vjedhje prej 800 milionë eurosh” ndaj qytetarëve dhe theksoi se cilësia e punimeve është e ulët, duke e konsideruar këtë si një aferë korruptive të radhës nga qeveria e Ramës.

“Autostrada Thumanë-Kashar është një projekt vjedhjeje që u bë për pasurimin e oligarkëve. Kjo është një vepër që kushton më tepër se një rrugë e ndërtuar në vende si Çekia. Drejtësia duhet të veprojë, sepse kemi të bëjmë me abuzim barbar,” përfundoi Hoti, duke bërë thirrje për hetim të plotë të kësaj çështjeje.