Këngëtarja e njohur spanjolle Rosalía përballet me një gjobë deri në 600,000 euro, pasi një performancë e papritur në sheshin Callao të Madridit shkaktoi kaos dhe bllokim total të trafikut.

Artistja 33-vjeçare kishte paralajmëruar në TikTok një “surprizë për fansat” në kuadër të prezantimit të kopertinës së re të revistës LUX, që u shfaq në një ekran gjigant në zemër të kryeqytetit.

Sipas mediave spanjolle, turma e madhe e fansave e detyroi këngëtaren të ndalonte makinën në mes të rrugës dhe më pas të vraponte drejt një hoteli pranë sheshit, ku përshëndeti nga dritarja. Pamjet u bënë menjëherë virale në rrjetet sociale.

Zyrtarët e Bashkisë së Madridit njoftuan se nuk ishte paraqitur asnjë kërkesë zyrtare për zhvillimin e aktivitetit në hapësirë publike.

“Nëse konfirmohet mungesa e autorizimit, do të aplikohen gjobat përkatëse,” — deklaroi nënkryetarja e bashkisë, Inma Sanz.

Ndërkohë, Policia e Madridit e cilësoi ngjarjen si “plotësisht spontane”, duke pranuar se është dashur të ndjekë informacionet në rrjetet sociale për të kuptuar situatën.

Hetimet vijojnë, ndërsa Rosalía ende nuk ka reaguar publikisht për incidentin që tronditi zemrën e Madridit.