Kreu i Partisë Demokratike, Sali Berisha, në një konferencë për shtyp, theksoi se protesta e djeshme kishte një rëndësi të madhe, duke shprehur se u çlirua kombi për tri orë dhe u rifitua sovraniteti. Ai falenderoi të gjithë të pranishmit, duke i quajtur ata heronj dhe guximtarë.

“Mbrëmë Shqipëria u çlirua për tri orë, rifitoi sovranitetin për tri orë. Fitorja më e madhe është mesazhi i shpresës që u përcollëm shqiptarëve: Opozita nuk ka frikë nga narkoshteti,” u shpreh Berisha.

Ai vazhdoi duke paralajmëruar se në të ardhmen protestat do të jenë edhe më të forta. “Herën tjetër do të jetë 3 ditë ose 3 javë nëse është nevoja. Jo vetëm bllokim rrugësh, por edhe okupim i institucioneve pa të cilat narkoshteti nuk funksionon dot,” theksoi Berisha, duke lënë të kuptohet se opozita do të vazhdojë të mobilizohet për të kundërshtuar qeverinë aktuale.