Ish-kryeministri Sali Berisha ka bërë një deklaratë për mediat, duke premtuar se nëse Partia Demokratike (PD) vjen në pushtet, do të rrisë pensionet me 20% dhe do të miratojë një minimum jetik prej 200 eurosh brenda mandatit të parë. Ai gjithashtu ka theksuar se rrogat do të dyfishohen, duke e justifikuar këtë me pretendimin se paratë do të merren nga “kontot e Edi Ramës dhe hajdutëve të tij”.

“Bëni një kërkim të vogël dhe shikoni sa para vidhen në vit. Janë këto para që vidhen, këto grabitje që frenohen, me të cilat ne do të vendosim minimumin jetik dhe rritjen e pagave,” tha Berisha. Ai theksoi se shqiptarët do të kenë fillimisht një minimum jetik prej 200 eurosh, dhe se çdo pension do të rritet me 20% brenda mandatit të parë.

“Sepse paraja në xhepat e qytetarit është gjithmonë më e vlefshme. Vetëm duke kthyer paratë në xhepat e qytetarit, shpopullimi frenon dhe Shqipëria shpëton,” shtoi ai.

Berisha gjithashtu u bëri thirrje skeptikëve dhe kritikëve që të besojnë në premtimet e opozitës, duke thënë se paratë do të vijnë nga ndalimi i korrupsionit dhe grabitjeve. “Opozita do të vazhdojë mosbindjen e saj civile, sa vjen më fuqishëm, më e vendosur dhe më e përshkallëzuar,” përfundoi ai.

Me një ton optimist, Berisha i inkurajoi mbështetësit e tij: “Rrofshi ju. Rroftë Partia Demokratike. Rroftë Shqipëria. Është radha jonë. O sot o kurrë, fitore!”