Prokuroria e Posaçme (SPAK) ka sekuestruar pasuri me vlerë rreth 5 milionë euro, në kuadër të hetimeve për Aurel Hoxhën, pronarin e kompanisë “Monopol”, aktualisht në kërkim për porositjen e vrasjes së Klevis Lleshit.
Sipas vendimit të Gjykatës së Posaçme, më 3 tetor 2025, është vendosur “sekuestro preventive” ndaj:
• 3 subjekteve tregtare,
• 7 apartamenteve,
• 6 njësive tregtare,
• 32 automjeteve luksoze (përfshirë Lamborghini Urus dhe Rolls Royce Cullinan),
• si dhe 52 llogarive bankare në emër të të afërmve dhe bashkëpunëtorëve të tij.
Subjektet nën sekuestro janë:
• “Monopol sh.p.k”, me ortak të vetëm A.K.,
• “Monopol Bar Lounge 24 orë”,
• dhe “Elite Event sh.p.k”.
Të gjitha këto biznese janë të regjistruara në rrugën “Myslym Shyri” në Tiranë, ku ndodhen edhe apartamentet dhe njësitë tregtare të sekuestruara.
Sipas SPAK, mjetet luksoze dhe llogaritë bankare janë në emër të A.K., K.K., L.K., Zh.Xh., S.L., dhe subjekteve të lidhura si “SALOU Rental” dhe “Monopol Exchange”.
Ekzekutimi i vendimit është ngarkuar Policisë së Shtetit dhe Agjencisë së Administrimit të Pasurive të Sekuestruara dhe Konfiskuara, ndërsa hetimet për origjinën e pasurisë vijojnë.
