Një histori shantazhi përmes rrjeteve sociale ka përfunduar me pranga në duart e policisë. Zyhra Korra, 44 vjeçe, nga Durrësi, u arrestua nga forcat e rendit pasi akuzohet se ka shantazhuar një grua 39-vjeçare nga Saranda, duke i marrë 5000 euro dhe kërcënuar se do t’i kërkonte edhe 50 mijë të tjera.

Sipas burimeve nga grupi hetimor, Korra kishte ndërtuar komunikimin me viktimën në internet, duke e futur në një kurth psikologjik përmes presioneve dhe kërcënimeve të vazhdueshme. Gruaja nga Saranda, e trembur se mund të ekspozohej publikisht, i dorëzoi fillimisht shumën prej 5000 eurosh, por kur kërkesat për para u shtuan, ajo vendosi të denoncojë rastin në polici.

Hetimet e Policisë së Sarandës, në bashkëpunim me Prokurorinë e Rrethit, çuan në identifikimin dhe arrestimin e autores së dyshuar. Ajo tashmë përballet me akuzën “Shtërngim me anë të kanosjes ose dhunës për dhënie pasurie”, një vepër që parashikon dënime të ashpra.

Policia ka sekuestruar pajisjet elektronike të 44-vjeçares, të cilat dyshohet se përmbajnë provat e komunikimeve kërcënuese. Ndërkohë, hetimet vijojnë për të zbuluar nëse pas këtij rasti qëndron një rrjet më i gjerë shantazhesh virtuale.