Shefja e Misionit të Bashkimit Evropian për Vëzhgimin e Zgjedhjeve në Kosovë (EOM), Nathalie Loiseau, ka kritikuar deklaratat e ish-emisarit amerikan Richard Grenell, të bëra pak ditë para zgjedhjeve të 9 shkurtit, duke i cilësuar si ndërhyrje jodiplomatike në procesin zgjedhor.

Në një konferencë për media, Loiseau tha se gjuha negative e përdorur nga partia në pushtet ndaj mediave ka qenë një tjetër shqetësim i vëzhguesve ndërkombëtarë.

“Kemi vërejtur me brengosje gjuhën negative nga partia në pushtet ndaj medias. Transmetuesit kanë dhënë kohë të barabartë për të gjitha partitë, por transmetuesi publik ka mundur të kontribuojë më shumë për komunitetet.”

Ajo shtoi se fushata në komunat me shumicë serbe ka qenë më e përmbajtur krahasuar me komunat e tjera dhe theksoi se procesi i zgjedhjeve ende nuk ka përfunduar plotësisht.

“Dua të përgëzoj votuesit që morën pjesë në këto zgjedhje historike. Në përgjithësi, dita e zgjedhjeve ishte e qetë, por fazat kritike të procesit zgjedhor ende mbeten për t’u përfunduar.”

Loiseau vuri në dukje se numërimi i votave ka nxjerrë në pah disa vështirësi, ndërsa Komisioni Qendror i Zgjedhjeve (KQZ) është përballur me sfida në punësim, trajnim dhe prokurim.

“Duhet të ketë transparencë të plotë për ato gjëra që nuk po shkojnë si duhet dhe arsyet pse.”

Deklaratat e saj pritet të hapin debat për mënyrën se si është menaxhuar procesi zgjedhor dhe ndikimin e faktorëve të jashtëm në të.