Një sasi lënde plasëse ka shpërthyer pranë një banese në fshatin Arrameras të Fushë-Krujës, mbrëmjen e së shtunës. Tritoli është vendosur në ambientet e jashtme të shtëpisë së 50-vjeçarit Alfred Kurti. Në të njëjtën banesë jetojnë edhe dy vëllezërit e martuar të Alfredit dhe nëna e tyre e moshuar. Fatmirësisht, nuk ka pasur të lënduar, edhe pse të gjithë pjesëtarët e familjes ishin brenda në momentin e shpërthimit.

Banesa ndodhet pranë aksit Fushë-Krujë-Tiranë, prej nga dyshohet se autorët janë larguar. Policia ka sekuestruar pamjet e kamerave të sigurisë në zonë për të identifikuar autorët. Ende nuk dihen shkaqet apo motivi i vendosjes së tritolit, dhe familja Kurti nuk njihet për probleme apo precedentë penalë. Ata merren me biznesin e mobilierisë.

Deklarata e Policisë

“Më datë 18.05.2024, rreth orës 22:10, në Arrameras, në ambientet e jashtme të banesës së shtetasit Alfred Kurti, dyshohet se ka shpërthyer një sasi e vogël lënde plasëse, dhe si pasojë ka vetëm dëme materiale (është dëmtuar porta e jashtme). Grupi hetimor po punon për sqarimin e rrethanave të ngjarjes, ndërsa u ngritën postblloqe në akset që lidhin Fushë-Krujën me pjesën tjetër të vendit me qëllim kapjen e autorëve,” njofton policia.