Janë zbardhur detaje të reja nga shpërthimi i tritolit që ndodhi mbrëmjen e djeshme në një apartament në katin e 9-të të një pallati në Tiranë, në rrugën “Sadik Petrela”. Ngjarja ndodhi rreth orës 23:45 dhe shpërthimi i fuqishëm ka alarmuar banorët e pallatit, të cilët kanë njoftuar menjëherë Policinë. Kur autoritetet kanë mbërritur në vendin e ngjarjes, kanë hapur me forcë derën e apartamentit dhe kanë konstatuar dëmtimin e xhamave dhe vetratave të ballkonit.

Dyshohet se tritoli mund të jetë hedhur me dron në ballkonin e apartamentit për shkak të lartësisë së katit (kati i 9-të), duke e bërë këtë një mënyrë të mundshme për të shmangur ndonjë ndjekje nga ana e autoriteteve.

Sipas burimeve, apartamenti është në pronësi të Albert Thoma, i cili ia kishte lëshuar me qira shtetases Elena Arza. Kjo e fundit është e afërme e Bernard Sinomatit, një personazh i njohur i krimit në Vlorë. Grupi hetimor ka mësuar se apartamenti është frekuentuar shpesh nga Sinomati, i cili dyshohet se mund të ketë qenë në banesë gjatë momentit të shpërthimit dhe më pas të ketë mundur të largohej nga vendngjarja.

Bernard Sinomati është vëllai i Sokol Sinomatit, i njohur me nofkën “Buzëderri” dhe një ish-anëtar i bandës së “Gaxhait”. Ai është gjithashtu i lidhur me një ngjarje të rëndë kriminale të ndodhur në Vlorë më 7 janar, kur nipi i tij, Gëzim Sinomati, u vra nga një snajper. Dyshohet se atentati mund të ketë qenë i destinuar për Bernard Sinomatin, por viktima mund të ketë qenë një shënjestër e gabuar. Po ashtu, në janar të vitit 2022, Bernard Sinomati ka qenë i shënjestruar nga një tjetër atentat, kur iu vendos tritol në automjetin e tij në Vlorë.

Ky shpërthim i tritolit në Tiranë është vetëm një ngjarje e fundit që lidhet me një seri krimesh të dhunshme që kanë ndodhur në Vlorë dhe që janë duke u hetuar nga autoritetet. Ndërkohë, ky incident ndodhi vetëm disa ditë pas atentatit ndaj 30 vjeçarit Kevin Hajrulla në Vlorë, i cili u plagos rëndë pas një sulmi me breshëri kallashnikovi më 18 dhjetor.