Shqipëria ka vendosur të dërgojë trupa shtesë në misionin paqeruajtës të NATO-s në Kosovë (KFOR) pas sulmit terrorist serb më 24 shtator në Banjskë. Ambasadori i Shqipërisë në Kosovë, Petrit Malaj, bëri këtë njoftim dhe shtoi se vitin e ardhshëm pritet të dërgohen edhe 40 trupa të tjera në kuadër të KFOR-it. Numri aktual i ushtarëve shqiptarë në Kosovë është mbi 100, dhe ata janë pjesë e misionit të NATO-s për të siguruar paqen dhe sigurinë në rajon. Diplomati shprehu bindjen se rreziku nga Serbia mund të jetë permanent, dhe për këtë arsye është e rëndësishme të forcohet prania e KFOR-it. Presidentja e Kosovës, Vjosa Osmani, ka njoftuar mbi planifikimin e mundshëm të sulmeve nga Serbia, duke shtuar shqetësimet për sigurinë në vend dhe rajon. Shqipëria shpreh përkushtimin e saj për të ndihmuar në rritjen e stabilitetit dhe sigurisë në Kosovë përmes kontributit të saj në KFOR.

Diplomati Malaj ka komentuar edhe deklaratat e presidentes së Kosovës, Vjosa Osmani se “Serbia po planifikon sulme të reja”. “Përderisa flet presidentja e Kosovës dhe strukturat e tilla të një shteti i cili është mirë i organizuar pa dyshim që ata kanë informacionin e duhur i dinë shumë mirë këto gjëra. Unë nuk kam informacionin e duhur, ndoshta për detaje, por di që rreziku mund të jetë permanent. Prandaj, duhet bëhen disa hapa dhe siç e tha edhe kryeministri jonë (Edi Rama) para disa ditësh, që Serbia me pas të vendos për të normalizuar këtë marrëdhënie. Nuk mund të shkojmë askund duke pasur vetëm konflikte. Patjetër që dialogu ka sjellë marrëveshje, ato kërkojnë zbatim të dy anshëm. Në rastin konkret Kosova ka bërë atë që duhet dhe po bën hapat e duhur për këtë gjë”, thekson Malaj.