Shqipëria do të vazhdojë të mbetet një partnere e përkushtuar në mbështetje të misionit të Koalicionit Global në luftën kundër ISIS-it. Kështu deklaroi Ministri i Punëve të Jashtme, Igli Hasani, gjatë takimit të forumit të Koalicionit Global në Washington D.C. Ai theksoi rëndësinë e rolit të Shqipërisë në luftën kundër terrorizmit dhe angazhimin e vendit për të kontribuar aktivisht në këtë mision, duke promovuar shoqëri të hapura dhe harmonike ndërfetare.

Gjatë takimit, i cili shënoi 10-vjetorin e themelimit të Koalicionit, u miratua një Deklaratë e përbashkët që bënte thirrje për tërheqjen e shtetasve nga kampet e Al-Hojit dhe Rojit, si dhe për vazhdimin e mbështetjes për forcat e sigurisë së Irakut, përmes kontribuimeve në Misionin e NATO-s (NMI).

Koalicioni Global kundër ISIS-it është një iniciativë e filluar nga Shtetet e Bashkuara dhe dhjetëra vende të tjera për të shkatërruar kalifatin e vetëshpallur të Shtetit Islamik, i cili në kulmin e tij zinte gati një të tretën e Irakut dhe Sirisë. Shqipëria u bashkua me këtë koalicion që në vitin e parë të tij.