Shqipëria ka hapur sot në Bruksel edhe katër kapituj të tjerë të negociatave për anëtarësim në Bashkimin Evropian, duke hedhur një hap të ri në rrugën e gjatë të integrimit.

Konferenca e 6-të Ndërqeveritare Shqipëri–BE, e cila u zhvillua me ftesë të Presidencës daneze të BE-së, bashkëdrejtohet nga kryeministri Edi Rama dhe ministrja për Çështjet Evropiane të Danimarkës, Marie Bjerre. Në delegacionin shqiptar bëjnë pjesë kryenegociatorja Majlinda Dhuka, ministrja Adea Pirdeni, zv/ministri i Drejtësisë Tedi Dobi, si dhe zyrtarë të linjës.

Këtë herë është hapur grup-kapitulli IV: “Agjenda e Gjelbër dhe Ndërlidhja e Qëndrueshme”, që përfshin fusha me ndikim të drejtpërdrejtë në jetën e qytetarëve dhe ekonominë:
• Kapitulli 14 – Politikat e transportit
• Kapitulli 15 – Energji
• Kapitulli 21 – Rrjetet trans-europiane
• Kapitulli 27 – Mjedisi dhe klima

Kryeministri Rama theksoi se hapja e këtyre kapitujve është “një hap tjetër i madh përpara në rrugën europiane të Shqipërisë”, ndërsa pala evropiane e përshëndeti progresin e shënuar në vetëm 11 muaj, ku janë hapur tashmë 28 kapituj nga 6 grupkapitujt.

Që prej vendimit të marsit 2020 për hapjen e negociatave, Shqipëria ka mbajtur gjashtë konferenca ndërqeveritare, ku janë çelur kapitujt për Themeloret, Marrëdhëniet e Jashtme, Tregun e Brendshëm, Konkurrueshmërinë dhe rritjen gjithëpërfshirëse, dhe sot, Agjendën e Gjelbër dhe Ndërlidhjen e Qëndrueshme.

Në fund të ditës, delegacionet do të mbajnë deklarata për shtyp dhe do të diskutojnë hapat e radhës në procesin e integrimit.