Një 22-vjeçar nga Fushë-Arrëzi është shpallur i zhdukur prej datës 13 shtator, pasi është larguar nga banesa dhe nuk është kthyer më.

Bëhet fjalë për shtetasin Elkrist Kola, i cili sipas familjarëve të tij është parë për herë të fundit në fshatin Luf të Pukës.

Denoncimi është bërë në Komisariatin e Policisë nga babai i tij, Z. Kola, 63 vjeç, i cili ka kërkuar ndihmën e autoriteteve për gjetjen e të birit.

Në njoftimin zyrtar, Policia bën me dije se po vijon puna për lokalizimin dhe kthimin e 22-vjeçarit pranë familjes.

Ditën e zhdukjes, Elkrist Kola ishte i veshur me xhins ngjyrë kafe, tuta sportive të zeza dhe atlete të zeza.