Shqipëria ka vendosur të mbyllë platformën sociale TikTok për një periudhë njëvjeçare pas vdekjes tragjike të një 14-vjeçari në një shkollë në Tiranë, ngjarje e cila tronditi vendin dhe nxiti debate të gjera mbi ndikimin e rrjeteve sociale tek të rinjtë.

Lajmi ka bërë jehonë në mediat ndërkombëtare si BBC, Washington Post, Corriere della Sera, La Repubblica, The Guardian, Reuters, Bloomberg dhe Associated Press. Ato raportojnë se shkak për këtë masë drastike ishte një konflikt mes dy adoleshentëve, i cili nisi në TikTok dhe përfundoi me vrasjen e njërit prej tyre në shkollën 9-vjeçare “Fan Noli” në Tiranë.

Sipas Washington Post, autoritetet shqiptare kanë zhvilluar mbi 1300 takime me mësues dhe prindër për të adresuar shqetësimet pas këtij incidenti tragjik. Gazeta citon Kryeministrin Edi Rama, i cili në një takim me prindër dhe mësues deklaroi: “TikTok do të jetë plotësisht i mbyllur për të gjithë. Nuk do të ketë TikTok në Republikën e Shqipërisë”.

BBC thekson se ngjarja ka ndezur një debat të gjerë midis prindërve, psikologëve dhe institucioneve arsimore mbi ndikimin që kanë rrjetet sociale tek të rinjtë. Raporti përmend gjithashtu se disa vende evropiane si Franca, Gjermania dhe Belgjika kanë kufizuar përdorimin e mediave sociale për fëmijët.

Nga ana tjetër, Deutsche Welle raporton se edhe vende fqinje si Kosova, Maqedonia e Veriut dhe Serbia po përballen me sfida të ngjashme dhe kanë ngritur shqetësime mbi efektet negative të TikTok tek të rinjtë.

Sipas La Repubblica, masa për mbylljen e TikTok është pjesë e një programi kombëtar të sigurisë për fëmijët në shkolla, i cili synon të krijojë një mjedis më të sigurt për të rinjtë dhe të reduktojë ndikimin negativ të platformave dixhitale në sjelljen e tyre.

Ky vendim pritet të sjellë reagime të ndryshme, si brenda vendit ashtu edhe në arenën ndërkombëtare, duke ngritur sërish çështjen e përgjegjësisë së platformave të mëdha dixhitale në mbrojtjen e fëmijëve dhe të rinjve.