Detaje të reja kanë dalë nga hetimet për zbulimin e një “shtëpie bari” në Peqin, ku shtatë efektivë policie janë pezulluar nga detyra për mosveprim. Sipas dosjes hetimore, dyshohet se ata kanë lejuar largimin e Romario Hasa, vëllait të ish-drejtorit të burgut të Rrogozhinës, Bilal Hasa.

Burime nga hetimi bëjnë me dije se oficerët e policisë gjyqësore kanë ndërmarrë veprime menjëherë pas zbulimit të rastit, duke sekuestruar kamerat e sigurisë dhe telefonat e personave të përfshirë, çka ka ngritur dyshime për mosreagim të qëllimshëm nga ana e efektivëve.

Fillimisht, për këtë ngjarje u vetëdorëzua në polici drejtori i burgut të Rrogozhinës, nën dyshimin se ambienti ishte në pronësi të tij. Por verifikimet e mëtejshme zbuluan se magazina ku kultivohej droga rezulton në emër të vëllait të tij, Romario Hasa.

Operacioni policor u zhvillua më 19 mars, kur efektivët ndërhynë në ambientet e magazinës, ku u gjetën dhe sekuestruan 1105 vazo me bimë narkotike. Një pjesë e tyre u asgjësua në vend me anë të djegies.

Hetimet vijojnë për të zbardhur plotësisht rolin e efektivëve të pezulluar dhe për të përcaktuar përgjegjësitë penale në këtë çështje.