Situata në territorin e Bashkisë Durrës paraqitet e qëndrueshme. Sipas informacioneve zyrtare, gjendja hidrike është normale, ndërsa lumi Erzen dhe lumi Ishëm vijojnë të jenë në kuota të zakonshme dhe mbahen nën monitorim të plotë nga strukturat përkatëse.

E qetë paraqitet edhe situata në Bashkinë Krujë. Mëngjesi i sotëm ka nisur me mot të kthjellët dhe gjatë natës nuk janë evidentuar problematika. Grupet e punës kanë dalë në terren dhe po vijojnë vlerësimin e dëmeve në banesa, akse rrugore dhe toka bujqësore të përmbytura nga reshjet e ditëve të kaluara. Ndërkohë, lumenjtë Gjole dhe Zezë janë në kuota normale dhe nën monitorim të vazhdueshëm.

Edhe në Bashkinë Shijak, nata ka kaluar pa probleme, ndërsa mëngjesi është shënuar me mot të kthjellët. Gjatë ditës së sotme, strukturat bashkiake do të vijojnë punën në terren për plotësimin e akt-konstatimeve të banesave të prekura nga uji.

Autoritetet lokale bëjnë me dije se situata po ndiqet në mënyrë të vazhdueshme dhe mbeten në gatishmëri për të ndërhyrë në rast të përkeqësimit të kushteve.