Olsi Komici, një nga figurat kyçe të procesit të vetingut në Shqipëri, është shfaqur në një miting elektoral të Partisë Socialiste në Athinë, ku shumica e pjesëmarrësve ishin të importuar nga Shqipëria.

Në një postim në rrjetet sociale, Komici ka publikuar një foto me deputetin socialist Taulant Balla, të cilin e cilëson si “makineri elektorale” dhe “politikan të popullit për popullin”.

Postimi i plotë i Olsi Komicit:
“Me gurin e çmuar të Librazhdit, Partisë Socialiste dhe gjithë Shqipërisë: Taulant Balla.
Një makineri elektorale, por mbi të gjitha një njeri me zemër të madhe, një politikan i popullit për popullin.
Vetëm respekt dhe mirënjohës, si shok dhe kontribuues në çdo aspekt të shoqërisë shqiptare.”

Nga vetingu tek AKU: Karriera e re e Komicit

Pas mbarimit të detyrës në Komisionin e Pavarur të Kualifikimit (KPK), Komici është emëruar në krye të Autoritetit Kombëtar të Ushqimit (AKU), një institucion që kohët e fundit është përfshirë në një skandal të rëndë me importin e mishit të infektuar me salmonelë.

Afera e mishit me salmonelë: Dështimi i AKU-së

Në muajt e fundit, AKU ka qenë në qendër të kritikave për lejimin e tonelatave me mish të kontaminuar me salmonelë të hynin në tregun shqiptar. Ky skandal ka ngritur shqetësime të mëdha për sigurinë ushqimore dhe neglizhencën e autoriteteve.

Përfshirja e Olsi Komicit, një nga njerëzit kyç të procesit të vetingut, në mitingjet elektorale të PS-së dhe më pas komandimi i tij në AKU ngre dyshime mbi pavarësinë e institucioneve dhe përdorimin e tyre për qëllime politike.