Sot u shpreh lamtumira e fundit për ‘Mjeshtrin e Madh’ të muzikës, Jorgo Papingji.

Në orën 11:00 u organizuan homazhet në ambientet e Radio Televizionit Shqiptar. Pas kësaj, trupi i Papingjit do të përcillet drejt banesës së fundit.

Presidenti i Republikës, Bajram Begaj, dërgoi një kurorë me lule në homazhet për Papingjin, i cili ndërroi jetë në moshën 82-vjeçare. Presidenti shprehu ngushëllimet e tij për familjen nëpërmjet një telegrami, duke shkruar:
“Ne që u rritëm me muzikën e veshur aq mjeshtërisht nga vargjet e teksteve të tij, ëndërruam, medituam e reflektuam mbi to, do ta kujtojmë si poetin më të dashur.

Tekstet e tij i rezistuan të gjitha kohërave, sepse ai nuk ra në kurthin e eksperimenteve kalimtare, por mbeti poeti besnik ndaj rëndësisë së fjalës.” Jorgo Papingji ndërroi jetë ditën e enjte, pasi ishte i shtruar në një sanatorium për një gjendje të rëndë shëndetësore.

Ai është një nga emrat më përfaqësues të muzikës së lehtë dhe popullore shqiptare, me mijëra tekste të shkruara dhe 4000 poezi të mirëfillta të përkthyer në melodi.

Emri i tij është i njohur në festivalet e muzikës së lehtë dhe për muzikën për fëmijë, ndërsa ka bashkëpunuar me artistë të tjerë të shquar si Luan Zhegu, Anila Bitri, Manjola Nallbani, Ledina Çelo dhe Aurela Gaçe.