Prokuroria e Posaçme Kundër Korrupsionit dhe Krimit të Organizuar ka thirrur këtë të premte kryebashkiakun e Shkodrës, Benet Beci, për t’i komunikuar zyrtarisht mbylljen e hetimeve ndaj tij.

Beci është marrë i pandehur për veprën penale të “shkeljes së barazisë në tendera apo ankande publike”, së bashku me shtatë persona të tjerë, në lidhje me tenderin me objekt “Zhvillimi strategjik i sektorit energjetik”, një projekt kërkimor me fond rreth 700 mijë euro.

Hetimet lidhen me procedurën e zhvilluar në vitin 2019, ku sipas SPAK janë konstatuar abuzime në procesin e tenderimit. Për këtë çështje është marrë e pandehur edhe Adela Ruko, bashkëshortja e ish-kreut të ARRSH-së, Evis Berberi. Ruko është paraqitur në SPAK javën e kaluar, ku ka marrë dijeni për mbylljen e hetimeve dhe ka firmosur aktet përkatëse.

Përveç Benet Becit dhe Adelës Ruko, të pandehur në këtë dosje janë edhe Jonid Kazani, Edlira Mitrushi, Yllka Nishku, Rudin Gjoni dhe Premtim Dauti.

SPAK bën me dije se Benet Beci është hetuar në gjendje të lirë, ndërsa vepra penale për të cilën akuzohet dyshohet se është kryer në periudhën kur ai mbante detyrën e titullarit të KESH (Korporata Elektroenergjitike Shqiptare), përpara se të zgjidhej kryebashkiak i Shkodrës.

Me mbylljen e hetimeve, pritet që Prokuroria e Posaçme të vendosë në vijim për dërgimin ose jo të çështjes për gjykim në Gjykatën Kundër Korrupsionit dhe Krimit të Organizuar.