Një analizë e thjeshtë gjaku mund të ndihmojë në parashikimin e rrezikut për zhvillimin e sëmundjes së Alzheimerit te të moshuarit që ende nuk shfaqin simptoma, deri në pesë ose edhe dhjetë vite përpara problemeve të para me kujtesën. Ky është përfundimi i një studimi të ri të publikuar në revistën shkencore JAMA, raportuar nga Associated Press.

Sipas studiuesve, testi mund të identifikojë personat me rrezik të lartë shumë përpara se të shfaqen dëmtimet njohëse. Megjithatë, ekspertët theksojnë se analiza nuk rekomandohet ende për përdorim të gjerë te individët e shëndetshëm.

Testi mat nivelin e një forme të proteinës tau, të njohur si p-tau217, e cila lidhet ngushtë me grumbullimin e pllakave amiloide dhe formimin e ngatërrimeve të proteinës tau në tru – dy shenjat kryesore biologjike të sëmundjes së Alzheimerit.

Sipas autorëve të studimit, sa më i lartë të jetë niveli i kësaj proteine në gjak, aq më i avancuar mund të jetë procesi patologjik në tru.

Studimi përfshiu 2.684 të rritur të moshuar, të cilët nuk kishin simptoma të Alzheimerit në momentin e përfshirjes në kërkim. Rezultatet treguan se personat me nivelet më të larta të p-tau217 kishin 38% rrezik për të zhvilluar dëmtime njohëse brenda pesë viteve dhe 78% rrezik brenda dhjetë viteve. Në të kundërt, pjesëmarrësit me nivele shumë të ulëta të biomarkerit rezultuan me rrezik të ulët.

Autorja kryesore e studimit, Dr. Reisa Sperling, nga Mass General Brigham Neuroscience Institute, theksoi se testi nuk duhet të kërkohet ende nga personat e shëndetshëm, pasi aktualisht nuk ekziston një trajtim i provuar që mund të ndryshojë ecurinë e sëmundjes përpara shfaqjes së simptomave.

Ajo rekomandoi që njerëzit të përqendrohen te masat e njohura për ruajtjen e shëndetit të trurit, si ushqyerja e shëndetshme, aktiviteti fizik i rregullt, gjumi cilësor dhe angazhimi në aktivitete sociale.

Edhe ekspertë të pavarur e cilësuan studimin një hap të rëndësishëm drejt diagnostikimit të hershëm të Alzheimerit, por nënvizuan se rezultatet, veçanërisht ato që lidhen me rrezikun 10-vjeçar, duhet të interpretohen me kujdes, pasi vetëm një pjesë e pjesëmarrësve u ndoqën për një periudhë kaq të gjatë.