Një ngjarje e pazakontë është regjistruar në Palasë, ku forcat e Policisë kanë ndërhyrë pas raportimeve për të shtëna me armë zjarri në bordin e një jahti luksoz.

Pas sinjalizimit, efektivët e Policisë Kufitare, të mbështetur nga forcat speciale, kanë rrethuar mjetin lundrues dhe kanë nisur menjëherë veprimet hetimore.

Sipas burimeve paraprake, dy persona që dyshohet se kanë lidhje me incidentin u larguan nga jahti me një gomone, por u ndaluan nga policia sapo dolën në breg.

Mes personave të shoqëruar është Astrit Gjonpalaj, ish-punonjës policie dhe aktualisht sipërmarrës, i njohur si pronar i kompanisë turistike “Globus Travel”. Po ashtu është shoqëruar edhe shtetasi shqiptaro-amerikan Astrit Meta.

Burime paraprake bëjnë me dije se të dy ndodheshin në jaht në momentin kur u përdor arma e zjarrit, ndërsa rrethanat e ngjarjes dhe roli i secilit mbeten objekt i hetimeve.

Ndërkohë, jahti është sekuestruar për ekspertim, ndërsa grupi hetimor po punon për zbardhjen e plotë të dinamikës së incidentit dhe për të përcaktuar arsyet që çuan në përdorimin e armës në një nga zonat më të frekuentuara të bregdetit shqiptar gjatë sezonit veror.