Dhjetëra milionë amerikanë po përballen sot me paralajmërime për një stuhi të fuqishme dimri, që preku nga rrafshnajat e mesme deri te qytetet e bregdetit lindor, me reshje dëbore të dendura, akull të grumbulluar dhe erëra të fuqishme.

Meteorologu Ryan Moe paralajmëroi se javët në vijim do të jenë më të këqijat në 40 vitet e fundit për shumë pjesë të vendit. “Ky nuk është një alarm i tepruar. Mendoni mirë ku mund të shkoni dhe si të ndihmoni ata që kanë nevojë,” theksoi ai.

Në Teksas, qytetarët kujtojnë stuhinë e vitit 2021, që shkaktoi ndërprerje masive të energjisë dhe humbje jete për mbi 200 persona. Tashmë reshjet e dendura kanë prekur veriperëndimin e Teksasit dhe Oklahoma, ndërsa më shumë se 150 milionë amerikanë kanë marrë paralajmërime për mot të keq. Gjendja e jashtëzakonshme është shpallur në 14 shtete dhe në Distriktin e Kolumbisë.

Për shkak të kushteve ekstreme, rreth 1.800 fluturime janë anuluar, përfshirë 1.200 nga Dallas. Guvernatorja e Nju Jorkut, Kathy Hochul, paralajmëroi banorët të mos e nënvlerësojnë të ftohtin: “Vetëm pesë minuta jashtë mund të jenë rrezik për jetën.”

Ndërsa autoritetet përgatiten për mot ekstrem, ish-presidenti Donald Trump përdori situatën për të ritheksuar skepticizmin e tij mbi ndryshimet klimatike, duke e bërë debat publik edhe më të nxehtë.