Një sulm kibernetik i përhapur globalisht po kërcënon mijëra organizata në mbarë botën për shkak të një të mete serioze sigurie në serverët e Microsoft SharePoint. Kompania me bazë në Redmond ka lëshuar menjëherë një paralajmërim dhe një përditësim sigurie, duke u bërë thirrje klientëve të saj të instalojnë menjëherë rregullimet për të parandaluar sulmet aktive.

Ekspertët e sigurisë kibernetike paralajmërojnë për një rrezik të madh sulmesh ransomëare që mund të dëmtojnë rëndë sistemet e agjencive qeveritare, universiteteve, kompanive të energjisë dhe telekomunikacionit në shumë vende, duke përfshirë SHBA-të, Evropën dhe Azinë. Më shumë se 10,000 organizata mund të jenë të ekspozuara ndaj këtij rreziku, sipas vlerësimeve të firmës së sigurisë “Censys”.

Në SHBA, Agjencia për Sigurinë Kibernetike dhe Infrastrukturës (CISA) konfirmoi se është në dijeni të këtij sulmi dhe po bashkëpunon për menaxhimin e krizës. Një ndër pasojat e sulmit ka qenë ndërprerja e sistemeve të IT të linjës ajrore Alaska Airlines, që detyroi kompaninë të pezullonte fluturimet në të gjitha itineraret e saj derisa problemi të zgjidhet.

Microsoft vazhdon të punojë për përmirësime të mëtejshme dhe paralajmëron që përdoruesit të mos vonojnë instalimin e paketave të sigurta për të shmangur dëmet e mundshme. Ky incident rikujton nevojën për masa të forta mbrojtjeje kibernetike në një kohë kur sulmet ndaj infrastrukturave kritike po rriten në shkallë globale.