Një sulm me armë zjarri është regjistruar në orët e para të mëngjesit të kësaj të marte në autostradën Tiranë-Durrës, ku shënjestër ka qenë ndërtesa e kompanisë farmaceutike CFO Pharma, në pronësi të biznesmenit Nadir Çausholli.

Sipas burimeve, godina është qëlluar me rreth 20 plumba automatiku, duke shkaktuar dëmtime të dukshme në fasadën e saj. Pamjet nga vendngjarja tregojnë gjurmë të shumta plumbash në pjesën e përparme të ndërtesës.

Ngjarja ka ngritur shqetësim të madh, ndërsa policia ka nisur hetimet për zbardhjen e sulmit, por deri tani nuk ka të dyshuar apo të arrestuar.

Biznesi CFO Pharma ndodhet në zonën e Kasharit, pranë autostradës, dhe është një nga kompanitë e njohura farmaceutike në vend. Autoritetet po analizojnë kamerat e sigurisë dhe po hetojnë nëse sulmi ka lidhje me ndonjë konflikt të mëparshëm apo është një akt i drejtpërdrejtë intimidimi ndaj biznesmenit Çausholli.

Hetimet vijojnë për të zbuluar autorët dhe motivin e sulmit.