Një incident i rëndë ka ndodhur në një autobus në qytetin e Siegen, Gjermani, ku pesë persona janë plagosur rëndë nga një sulm me thikë. Ngjarja u shkaktua nga një grua 32-vjeçare, e cila nxori thikën dhe sulmoi pasagjerët e tjerë, teksa autobusi po qarkullonte drejt një feste në qytet. Të plagosurit janë dërguar në spital, ku mjekët po luftojnë për jetën e tre prej tyre.

Policia arriti të arrestojë agresoren, e cila dyshohet se ishte nën ndikimin e alkoolit në momentin e sulmit. Autoritetet ende nuk kanë dhënë shpjegime për motivet e sulmit, por kanë deklaruar se deri më tani nuk ka prova që sugjerojnë një akt terrorist.

Ky është sulmi i katërt me thikë që ndodh në landin e Renanisë Veriore-Vestfalisë (NRW) brenda shtatë ditëve. Në incidente të tjera të ngjashme, një terrorist islamik në Solingen vrau tre dhe plagosi tetë persona, ndërsa në Moers dhe Recklinghausen ndodhën sulme të tjera me thika, ku policia vrau dy sulmues. Ngjarja e fundit vjen pas masave të marra nga qeveria gjermane për parandalimin e ngjarjeve të tilla dhe për dëbimin e personave që u është refuzuar azili.