Autoritetet në Hong Kong kanë ngritur alarmin në nivelin më të lartë për tajfunin Wipha, ndërsa stuhia tropikale po afrohet me shpejtësi drejt bregdetit jugor të Kinës. Observatori Meteorologjik i Hong Kongut lëshoi paralajmërimin T10 – niveli maksimal për erëra me forcë uragani – duke sinjalizuar shpejtësi erërash mbi 118 km/h dhe rrezik serioz për jetën dhe infrastrukturën.

Stuhia ndodhej rreth 60 kilometra në juglindje të qytetit në orën 10:00 të mëngjesit me orën lokale dhe po përparon drejt provincës Guangdong, ndërsa forca e saj po rritet ndjeshëm. Për shkak të motit ekstrem, autoritetet kanë mbyllur shkollat dhe kanë ndërprerë pjesërisht shërbimin hekurudhor, ndërsa linjat e trenave operojnë me shpejtësi të reduktuar.

Tajfuni ka ndërprerë rëndë edhe transportin ajror – rreth 500 fluturime janë anuluar dhe 400 të tjera pritet të preken gjatë orëve në vijim. Aeroporti ndërkombëtar i Hong Kongut është kthyer në një pikë kaosi për pasagjerët, ndërkohë që shumë udhëtarë janë bllokuar.

Më shumë se 200 persona janë strehuar në qendra të përkohshme të ngritura nga qeveria, ndërsa mediat lokale raportojnë për valë të fuqishme që kanë goditur zonën bregdetare të Heng Fa Chuen, në lindje të ishullit të Hong Kongut.

Ndërkohë, provincat fqinje kineze Hainan dhe Guangdong janë vënë gjithashtu në gjendje gatishmërie, teksa autoritetet përgatiten për ndikimin e drejtpërdrejtë të tajfunit. Stuhia Wipha pritet të shkaktojë reshje të dendura, përmbytje dhe dëme të konsiderueshme në zonat që ndodhen në trajektoren e saj.