Orët e para të vitit të ri 2025 janë shoqëruar me trazira në Tiranë, kur në një prej klubeve të njohura të natës, “Cinco Cavalli”, u raportua për të shtëna me armë zjarri. Ngjarja ka ndodhur gjatë performancës së reperit të njohur Stresi, dhe pas tij pritej të performonte këngëtarja Dafina Zeqiri. Sipas njoftimit të Policisë së Tiranës, autorët e të shtënave janë identifikuar dhe shpallur në kërkim, por ende nuk janë bërë të ditura gjeneralitetet e tyre.
Policia e Tiranës ka nisur hetimet intensive për të zbardhur plotësisht ngjarjen. Sipas burimeve të besuara, Jetmir Pepa, një biznesmen i njohur në Tiranë dhe me precedentë penalë, dyshohet si autori i të shtënave. Pepa, i njohur ndryshe si Mir Pepa, ka hyrë i armatosur në klub dhe ka qëlluar në ajër. Ai është personi që u bë i njohur vitin e kaluar pas një incidenti të dhunshëm, kur ish-bashkëshortja e tij, Mariela Berisha, sulmoi dhe plagosi në një lokal të dashurën e tij, Klea Prenga.
Ngjarja ka ngritur shqetësime lidhur me sigurinë në ambiente të tilla, duke u bërë thirrje organeve të rendit për të intensifikuar kontrollet dhe hetimet lidhur me mënyrën se si individë me të kaluar kriminale mund të depërtojnë në ambiente të tilla dhe të shkaktojnë trazira të tilla. Sipas policisë, asnjë person nuk ka mbetur i lënduar nga të shtënat, dhe hetimet janë duke vazhduar për të kapur dhe vënë përpara përgjegjësisë autorët e dyshuar.
