Një incident i rëndë me armë zjarri ka ndodhur në bashkinë Chribska në Republikën Çeke, ku të paktën një person ka humbur jetën, ndërsa disa të tjerë janë plagosur, raportojnë mediat e huaja.

Policia njoftoi se autori i të shtënave u qëllua për vdekje dhe nuk paraqet më rrezik për publikun. Sipas burimeve fillestare, dy persona kanë humbur jetën brenda zyrës së bashkisë, ndërsa një grua thuhet se ka qenë viktimë, edhe pse kjo ende nuk është konfirmuar zyrtarisht.

Motivi i ngjarjes mbetet i paqartë, ndërkohë që autoritetet po vazhdojnë hetimet për të sqaruar rrethanat e ngjarjes. Policia bëri apel për qetësi dhe siguri në zonë, duke garantuar se situata është nën kontroll.