Ndërsa Moska përgatitet për festimet e 9 Majit, Ditës së Fitores mbi nazizmin, dy nga të vetmit liderë evropianë që pritej të merrnin pjesë në paradën e Kremlinit – presidenti serb Aleksandar Vuçiq dhe kryeministri sllovak Robert Fico – kanë anuluar papritur pjesëmarrjen e tyre, duke nxitur spekulime dhe teori të shumta në mediat ndërkombëtare dhe ruse.

Sipas raportimeve të mediave ruse dhe europiane, gjatë fundjavës janë qarkulluar teori kontradiktore, që variojnë nga helmimi i mundshëm për të penguar udhëtimin e tyre, deri te simulimi i problemeve shëndetësore për arsye strategjike. Portali rus “360” hodhi hipotezën e helmimit, pa ofruar prova, ndërsa një tjetër portal përmendi motive të mundshme politike dhe të sigurisë.

Aleksandar Vuçiq, i cili ndodhej për një vizitë në SHBA, u shtrua në spital në Beograd të shtunën pas përkeqësimit të gjendjes shëndetësore. Vizita në Amerikë u ndërpre papritur, ndërkohë që arsyet zyrtare mungojnë. Nga ana tjetër, Robert Fico anuloi udhëtimin e planifikuar në Mbretërinë e Bashkuar dhe bëri ndryshime në agjendë, por të dielën konfirmoi në një konferencë për shtyp se planet për Moskën nuk kishin ndryshuar.

Gjatë konferencës, i irrituar nga pyetjet mbi shëndetin e tij, Fico u shpreh: “Shëndeti im nuk është puna juaj”, megjithëse pranoi se vazhdon të përballet me probleme si pasojë e atentatit që i mbijetoi një vit më parë.

Në një zhvillim paralel, presidenti ukrainas Volodymyr Zelensky kishte deklaruar se Ukraina nuk mund të garantojë sigurinë e liderëve që marrin pjesë në Moskë, duke theksuar se kjo është përgjegjësi ekskluzive e Rusisë.

Situata ngre pikëpyetje të shumta mbi rrezikun diplomatik dhe politik që mbart pjesëmarrja në festimet e organizuara nga Kremlini në një kohë konflikti dhe tensioni të thelluar mes Rusisë dhe Perëndimit.