Situata është tensionuar sërish mëngjesin e kësaj të marte në kantierin e Aeroportit të Vlorës, ku hyrja kryesore është bllokuar nga kamionë të kompanisë 2A Group, duke penguar hyrjen e nënkontraktorëve të kompanisë MABCO.

Sipas informacioneve paraprake, bllokimi i portës kryesore është bërë me qëllim moslejimin e vijimit të punimeve nga grupet e kontraktuara prej MABCO-s, duke përshkallëzuar më tej konfliktin mes palëve.

Burime nga vendngjarja bëjnë me dije se në momentet e para të tensionit, disa prej nënkontraktorëve të MABCO-s kanë arritur të futen me forcë në ambientet e kantierit. Megjithatë, hyrja është mbyllur sërish pak më vonë dhe aktualisht vijon të mbahet e bllokuar nga dy kamionë të vendosur në portën kryesore.

Përplasja e radhës vjen në vazhdën e mosmarrëveshjeve mes kompanive MABCO dhe 2A Group, konflikt që lidhet me administrimin dhe vijimin e punimeve në projektin e Aeroportit të Vlorës.

Ndërkohë, situata në terren mbetet e tensionuar dhe konflikti mes palëve po ndikon drejtpërdrejt në ecurinë e punimeve në një prej projekteve më të rëndësishme infrastrukturore në vend.