Dhjetëra shkolla në Angli dhe Uells kanë vendosur të mbyllen ose të reduktojnë orarin mësimor për shkak të valës së të nxehtit që pritet të përfshijë Britaninë në ditët e ardhshme.

Mes institucioneve që kanë njoftuar masa të jashtëzakonshme është Shkolla Buckingham në Buckinghamshire, e cila do të zhvillojë mësimin online për dy ditë. Ndërkohë, St John’s Marlborough në Wiltshire ka njoftuar se do të qëndrojë e mbyllur deri të premten.

Edhe Akademia Dorcan në Swindon ka vendosur të përfundojë mësimin më herët, ndërsa do të mbyllë aktivitetin për dy ditë si masë parandaluese ndaj temperaturave të larta.

Vendime të ngjashme janë marrë edhe nga institucione të tjera arsimore në Wiltshire, Slough, Reading, Surrey dhe Londër, ku drejtuesit e shkollave po përpiqen të minimizojnë rreziqet që kushtet ekstreme të motit mund të paraqesin për nxënësit dhe stafin.

Shoqata Kombëtare e Drejtorëve të Shkollave (NAHT) ka publikuar udhëzime për menaxhimin e situatës, duke theksuar se, megjithëse nuk ekziston një kufi maksimal ligjor për temperaturat në shkolla, institucionet duhet të ndërmarrin çdo hap të nevojshëm për të garantuar sigurinë dhe mirëqenien e fëmijëve.

“Drejtuesit e shkollave do të bëjnë gjithçka që është e mundur për të zbutur ndikimin e temperaturave ekstreme”, deklaroi sekretari i përgjithshëm i NAHT-së, Paul Whiteman.

Meteorologët paralajmërojnë se temperaturat mund të arrijnë nivele të pazakonta për Britaninë, duke shtuar shqetësimet për ndikimin e valës së të nxehtit në sistemin arsimor dhe shëndetin publik.