Zbardhet dëshmia në polici e reperit Ervin Selita, ose siç njihet me emrin e artit “Vinz” i cili qëlloi me armë zjarri drejt pronarit të një hoteli në Tiranë pas një konflikti që nisi me recepsionistin.

Selita është shprehur se ka qenë klient i përhershëm i këtij hoteli dhe në momentin e konfliktit, ai ka qenë i dehur.

Sipas dëshmisë së dhënë në polici, ai thotë se nuk e di se çfarë po i kërkonin vajzës me të cilën shoqërohej. Selita pretendon se është provokuar nga pala tjetër, por nuk pati qëllim që t’i bënte keq njeriut.

“Nuk e di se çfarë ka ndodhur! Kisha pirë me parë dhe isha nën efekt alkoolit! Se kuptova se çpo i kërkonin vajzës time! Kam vite që e frekuentoj si hotel dhe ata më njohin shumë mirë! Ata më provokuan por unë nuk pata qëllim t’i bëja gjë të keqe kujt! Nuk e di fiks se çfarë ndodhi” -është shprehur Selita në polici.

Ngjarja ka ndodhur mëngjesin e sotëm në një prej hoteleve në kryeqytet. Mësohet se konflikti fillimisht ka nisur me recepsionistin e hotelit i cili i kërkoi kartën e identitetit vajzës me të cilën shoqërohej reperi.

Në konflikt u përfshi dhe pronari i hotelit dhe në këtë moment, Vinz ka nxjerrë armën dhe ka tentuar ta vrasë. Fatmirësisht nga kjo ngjarje nuk është lënduar njeri.