Një incident është regjistruar në ambientet e një supermarketi “Big Market”, ku një person i dyshuar për tentativë grabitjeje është përfshirë në një përplasje me forcat e policisë gjatë ndërhyrjes për neutralizimin e tij.

Sipas dëshmitarëve në vendngjarje, i dyshuari tentoi të merrte me forcë disa produkte brenda marketit, ndërsa rrethanat e plota të ngjarjes mbeten ende nën hetim.

Pamjet e siguruara tregojnë momentin kur personi i dyshuar shoqërohet me ambulancë, pasi ka mbetur i lënduar gjatë incidentit. Në video shihet gjithashtu se ai ka kundërshtuar me forcë efektivët e Forcës së Posaçme “Shqiponja”, të cilët ndërhynë për ta vënë nën kontroll.

Për shkak të rezistencës së tij, efektivët janë detyruar të qëndrojnë pranë tij edhe brenda ambulancës gjatë transportimit.

Policia po vijon veprimet hetimore për të sqaruar dinamikën e plotë të ngjarjes dhe për të përcaktuar përgjegjësitë ligjore të personit të përfshirë.