Aktori i njohur amerikan Tom Cruise u vlerësua me “Oscar-in e Nderit” në ceremoninë e Çmimeve të Guvernatorëve, një nga eventet më prestigjioze të Akademisë së Arteve dhe Shkencave të Filmit. Çmimi iu dorëzua nga regjisori Alejandro G. Iñárritu, me të cilin Cruise po bashkëpunon në një projekt të ri kinematografik që pritet të publikohet vitin e ardhshëm.

I nominuar katër herë për çmim “Oscar”, Cruise mbajti një fjalim të fuqishëm dhe emocional, duke theksuar se kinemaja ka qenë gjithmonë thelbi i jetës së tij.
“Të bëj filma nuk është ajo që bëj, është ajo që jam,” deklaroi aktori, ndërsa theksoi se arti i filmit e ka çuar nëpër botë, i ka hapur mendjen dhe i ka treguar se sa shumë ngjashmëri kanë njerëzit, pavarësisht prejardhjes.

Ceremonia nderoi gjithashtu koreografen Debbie Allen dhe dizenjatorin e produksionit Wynn Thomas. Ndërkohë, këngëtarja Dolly Parton u shpërblye me “Çmimin Humanitar Jean Hersholt” për kontributet e saj të gjata në bamirësi, duke dërguar një mesazh falënderues përmes videos pasi nuk mundi të ishte e pranishme.

Megjithëse Tom Cruise ende nuk ka fituar një çmim “Oscar” kompetitiv, rolet e tij të spikatura në “Born on the Fourth of July”, “Jerry Maguire”, “Magnolia” dhe sukseset e tij si producent, përfshirë “Top Gun: Maverick”, e kanë kthyer atë në një ikonë të padiskutueshme të kinemasë botërore.

Akademia vlerësoi angazhimin e tij të jashtëzakonshëm për komunitetin e filmave, përkushtimin ndaj eksperiencës teatrale dhe rolin e tij si një nga figurat më të rëndësishme të akrobacive në film.

Në këtë edicion, ceremonia e Guvernatorëve nderoi katër figura legjendare, karrierat e të cilëve kanë lënë gjurmë të thella në industrinë e filmit.