Pas më shumë se një jave kërkimesh intensive, është gjetur pa shenja jete 70-vjeçari Jashar Spaho, i cili ishte raportuar i zhdukur nga familjarët që prej datës 28 qershor. Trupi i të moshuarit u zbulua këtë të mërkurë në lumin Devoll, në segmentin midis fshatrave Tren dhe Bitinckë.

Familjarët kishin bërë thirrje të vazhdueshme për ndihmë, madje edhe përmes mediave, në përpjekje për të lokalizuar të afërmin e tyre, por fatkeqësisht kërkimi përfundoi me një epilog tragjik.

Sipas burimeve zyrtare nga Policia e Korçës, po hetohet në dy pista kryesore: një aksident i mundshëm që mund të ketë çuar në rënien e 70-vjeçarit në lumë, apo një akt vetëvrasjeje. Trupi i pajetë është dërguar në morgun e spitalit rajonal, ku pritet kryerja e ekspertizës mjeko-ligjore për përcaktimin e shkakut të saktë të vdekjes.

Ndërkohë, komuniteti lokal dhe të afërmit e viktimës janë në zi për humbjen e papritur të 70-vjeçarit, ndërsa autoritetet vijojnë hetimet për zbardhjen e plotë të ngjarjes.