Futbolli spanjoll është goditur rëndë nga një humbje tragjike. Zeben Ramos, mbrojtës i talentuar i ekipit Las Palmas C, ka ndërruar jetë në moshën 23-vjeçare, si pasojë e një aksidenti të rëndë rrugor që ndodhi më 9 qershor në zonën e Arucas, në ishullin Gran Canaria.

Lojtari kishte qëndruar në koma për plot 15 ditë, duke luftuar mes jetës dhe vdekjes në spital, por plagët e marra rezultuan fatale. Lajmin e trishtë e konfirmoi vetë klubi i Las Palmas përmes një deklarate zyrtare dhe një video prekëse në nderim të futbollistit të ndjerë.

“UD Las Palmas shpreh keqardhjen më të thellë për ndarjen nga jeta të Zebensui Ramos González, i njohur në futboll si Zeben,” thuhet në deklaratë.
“Lojtari i Las Palmas C nuk mundi të mbijetojë nga plagët e marra në aksidentin tragjik më 9 qershor.”

Mbrojtës i talentuar dhe njeri shembullor

Zeben Ramos përshkruhet nga klubi si një mbrojtës i majtë shumë i adaptueshëm, i përkushtuar dhe me një sjellje shembullore, brenda dhe jashtë fushës. Performanca e tij e vazhdueshme e kishte afruar me ekipin rezervë të Las Palmas, ndërsa shihej si një talent me të ardhme premtuese në futbollin spanjoll.

“Familja e ‘Verdheve’ është në zi. Ngushëllimet më të sinqerta për familjen, miqtë dhe bashkëlojtarët e tij. Zeben do të mbetet përjetë në zemrat tona,” përfundon deklarata e klubit.

Një sezon i vështirë për Las Palmas

Tragjedia e humbjes së Ramos vjen në një moment të vështirë për Las Palmas, që këtë sezon ra nga La Liga pas renditjes në vendin e 19-të. Klubi përfshinte lojtarë me emër ndërkombëtar si Adnan Januzaj, Scott McKenna dhe Oli McBurnie, ndërsa kishte në huazim Stefan Bajcetic nga Liverpool dhe Fabio Silva nga Wolves.

Ndërkohë, komuniteti i futbollit në Ishujt Kanarie dhe më gjerë ka shprehur solidaritet dhe ngushëllime për ndarjen e parakohshme nga jeta të një futbollisti që kishte ende shumë për të dhënë.