Një ngjarje e rëndë ka ndodhur në Greqi, ku një djalë 6-7 vjeçar me origjinë shqiptare ka humbur jetën teksa u mbyt në plazhin pranë shtëpisë së tij. Ngjarja ka ndodhur në komunitetin lokal të Arvit në Kretë, ku Nikolasi, i cili ndodhej me nënën e tij në shtëpi, i ka kërkuar asaj që të shkojë në plazh për të notuar. Nëna e tij nuk e ka lejuar, por ai arriti të largohej fshehurazi nga shtëpia dhe shkoi në plazhin që ndodhej disa dhjetëra metra larg shtëpisë.

Sipas medias greke Creta24.gr, disa minuta pas largimit nga shtëpia, Nikolasi u nxor nga uji pa ndjenja. Një banor i zonës pa fëmijën duke notuar pa ndjenja dhe ngriti menjëherë alarmin. Urgjenca u thirr në orën 13:30 dhe mësohet se djali ishte i shtrirë me fytyrë përtokë në ujë.

Në vendngjarje mbërritën banorë të fshatit dhe kalimtarë të rastit, të cilët, me ndihmën e një defibrilatori dhe mjekëve, tentuan të rikthejnë fëmijën. Ambulanca mbërriti menjëherë dhe fëmija u transportua në Qendrën Shëndetësore të Viannos, por fatkeqësisht nuk ia doli.