Një tragjedi e rëndë ka goditur qytetin lindor të Koçanit, Maqedoni e Veriut, ku një zjarr shkatërrues në një klub nate ka marrë jetën e të paktën 50 personave në orët e vona të natës. Numri i të plagosurve mbetet i paqartë, por shumë prej tyre janë dërguar me urgjencë në klinikat e Shtipit dhe Shkupit.

Shkaqet e zjarrit ende nuk janë konfirmuar nga autoritetet, por sipas mediave lokale, dyshohet se mjetet piroteknike, të përdorura gjatë performancës së bandës maqedonase DNA, mund të kenë shkaktuar shpërthimin fatal. Në momentin e tragjedisë, klubi ishte i mbushur plot me njerëz.

Zjarrfikësit, ambulancat dhe policia mbërritën menjëherë në vendngjarje, ndërsa skenat e panikut dhe dëshpërimit vazhdojnë mëngjesin e sotëm. Të afërmit e viktimave janë mbledhur para klubit, duke pritur me ankth informacion për të dashurit e tyre.

Një grua e dëshpëruar ka treguar për Radion Evropa e Lirë:

“Po kërkoj mbesën time. Nuk na lejojnë të hyjmë dhe nuk e dimë ku është ajo. Telefoni i saj punon, por ajo nuk po përgjigjet. Dikush duhet të na tregojë ku ta kërkojmë!”

Drejtori i Qendrës për Menaxhimin e Krizave, Stojançe Angellov, ka mbërritur në Koçan, së bashku me ministrin e Mbrojtjes Pançe Toshkovski dhe Drejtorin e Byrosë për Siguri Publike, Aleksandar Janev.

Autoritetet pritet të japin një deklaratë zyrtare gjatë ditës, ndërsa tragjedia ka tronditur mbarë rajonin, duke ngritur pyetje mbi masat e sigurisë në vendet publike.