VLORË – Një ngjarje e rëndë tronditi qytetin e Vlorës këtë të hënë, ku një vajzë 17-vjeçare tentoi t’i jepte fund jetës duke u vetëplagosur me armë zjarri. Ngjarja ndodhi në lagjen “Kushtrimi”, ndërsa adoleshentja ndodhet në gjendje kritike në Spitalin e Traumës në Tiranë.

Sipas burimeve mjekësore, vajza ka marrë dy dëmtime në kokë – një pranë syrit, afër temthit, dhe një tjetër në pjesën e sipërme të kafkës. Mjekët konfirmojnë se 17-vjeçarja është e intubuar dhe ndodhet në koma, ndërsa mrekullisht ka mbetur ende në jetë për shkak të mungesës së një hemorragjie të brendshme fatale.

Dyshohet se e reja ka ndërmarrë aktin ekstrem nën kushte të rënduara psikologjike, pas një konflikti me të atin. Burime pranë familjes bëjnë me dije se vajza jetonte me gjyshërit, pasi prindërit janë divorcuar. I ati, i cili jeton në një fshat pranë Vlorës me bashkëshorten e re, kishte kërkuar që vajza të transferohej të jetonte me të, propozim që ajo e ka kundërshtuar fort.

Mësohet se kjo ka sjellë tensione të përsëritura dhe presion emocional ndaj adoleshentes, e cila dyshohet se ka marrë një pistoletë dhe është vetëqëlluar në banesë.

Pasi është gjetur nga familjarët, ajo është transportuar fillimisht në Spitalin Rajonal të Vlorës, ku ka humbur ndjenjat menjëherë pas mbërritjes. Më pas është dërguar me urgjencë drejt Tiranës për trajtim të specializuar në Spitalin e Traumës.

Grupi hetimor ka nisur menjëherë punën për të sqaruar të gjitha rrethanat e ngjarjes, ndërsa policia po heton edhe mënyrën se si arma e zjarrit ka përfunduar në duart e vajzës.

Një ngjarje që rikthen në qendër të vëmendjes nevojën për kujdes të veçantë ndaj shëndetit mendor të të rinjve, si dhe përgjegjësinë institucionale e familjare për t’i mbrojtur ata nga situata të ngjashme tragjike.