Një ngjarje e rëndë është raportuar në fshatin Xhyherinë, në Vlorë, ku një 23-vjeçare, e identifikuar si Ola Metani, dyshohet se ka konsumuar fotoksinë dhe për pasojë ka humbur jetën.

E reja ishte e fejuar dhe jetonte me partnerin e saj. Lajmi i ndarjes së saj nga jeta ka tronditur familjarët dhe të afërmit.

Mes reagimeve më prekëse është ai i xhaxhait të saj, i cili në një postim në rrjetet sociale shkruan:

“O Ola e xhaxhit. Menduam që mjaft i kemi pasur lotët, por ikja jote na hidhëroi shpirtin. Ishte një lule e bukur dhe e tillë do të mbetesh gjithë jetën, o yll i bukur, që na loton zemrën dhe shpirtin. Lamtumirë, o yll i xhaxhit.”

Deri në këto momente, Policia e Vlorës nuk ka reaguar zyrtarisht dhe nuk ka dhënë detaje mbi rrethanat e ngjarjes.

Ndërkohë, në rrjetet sociale kanë qarkulluar pretendime nga persona që prezantohen si të njohur të së resë, lidhur me shkaqet e mundshme të ngjarjes. Megjithatë, këto pretendime nuk janë konfirmuar nga autoritetet dhe mbeten të paverifikuara.