Pas zjarrit të regjistruar më herët në malin e Shëngjinit, gjatë ditës së sotme janë shfaqur edhe tre vatra të tjera zjarri në qarkun e Lezhës, konkretisht në Zadrimë, Balldren dhe Pllanë.

Sipas informacioneve paraprake, zjarret në Zadrimë dhe Balldren kanë përfshirë sipërfaqe bujqësore, por janë vënë nën kontroll nga shërbimet zjarrfikëse, duke shmangur përhapjen e flakëve.

Situata mbetet më problematike në Pllanë, ku zjarri ka përfshirë një sipërfaqe pyjore. Në terren ndodhen forca të shumta zjarrfikëse, të cilat po punojnë për izolimin e flakëve, pasi në afërsi të vatrës ndodhen edhe banesa.

Autoritetet vijojnë ndërhyrjen për shuarjen e zjarrit, ndërsa shkaqet e rënies së vatrave mbeten ende të paqarta.