Ish-presidenti i SHBA-së, Donald Trump, ka nënshkruar tre urdhra ekzekutivë që synojnë të forcojnë sigurinë kombëtare ajrore dhe të nxisin zhvillimin e teknologjive të reja në aviacion, përfshirë dronët, taksitë ajrore elektrike (eVTOL) dhe fluturimet komerciale supersonike.

Sipas Shtëpisë së Bardhë, një nga urdhrat lejon përdorimin e dronëve përtej vijës së dukshmërisë së operatorëve, një hap thelbësor për të avancuar dërgesat komerciale dhe për të reduktuar varësinë nga prodhuesit kinezë të këtyre pajisjeve.

Trump ka urdhëruar gjithashtu krijimin e një task force federale për të mbikëqyrur kontrollin e hapësirës ajrore, për të zgjeruar kufizimet në zona të ndjeshme dhe për të gjurmuar dronët në kohë reale, veçanërisht në funksion të sigurisë në ngjarjet e mëdha publike si Lojërat Olimpike apo Kupa e Botës.

“Po sigurojmë kufijtë tanë nga kërcënimet e sigurisë kombëtare – përfshirë ato në ajër,” deklaroi Michael Kratsios, drejtor i Politikës së Shkencës dhe Teknologjisë në Shtëpinë e Bardhë.

Sebastian Gorka, drejtor për antiterrorizmin në Këshillin e Sigurisë Kombëtare, përmendi përdorimin masiv të dronëve në luftën e Ukrainës dhe kërcënimet e ngjashme në SHBA:

“Do të forcojmë ligjet tona për të penguar dy lloje njerëzish: kriminelët dhe budallenjtë,” tha ai.

Në një tjetër veprim me ndikim afatgjatë, Trump i ka kërkuar Administratës Federale të Aviacionit (FAA) të heqë ndalimin e fluturimeve supersonike mbi tokë, një masë që daton që nga viti 1973. Kjo do të hapte rrugën për një epokë të re të udhëtimeve ajrore shumë më të shpejta brenda SHBA-së.