Presidenti i Shteteve të Bashkuara, Donald Trump, u ka thënë privatisht donatorëve se dëshiron që zëvendëspresidenti JD Vance të jetë kandidati i Partisë Republikane në zgjedhjet presidenciale të vitit 2028, duke sinjalizuar gatishmëri për ta mbështetur atë.

Sipas një raportimi të “The Washington Post”, gjatë një takimi me donatorët në Zyrën Ovale rreth dy javë më parë, Trump është shprehur: “Në fund të fundit, ne duhet të zgjedhim JD”.

Ky qëndrim ndryshon nga deklaratat e mëparshme publike të Trump, i cili gjatë vitit të fundit ka nxitur një garë mes Vance dhe Sekretarit të Shtetit, Marco Rubio, pa përcaktuar një pasardhës të preferuar.

Trump ka lavdëruar të dy figurat republikane dhe ka sugjeruar më herët edhe mundësinë që ata të kandidojnë së bashku në një biletë presidenciale, ndërsa ka shmangur një mbështetje të drejtpërdrejtë për njërin prej tyre.

Megjithatë, pavarësisht sinjaleve të dhëna për donatorët në favor të Vance, presidenti amerikan raportohet se ka vijuar t’u kërkojë këshilltarëve të tij të krahasojnë potencialin politik të Vance dhe Rubio.

Një zyrtar i Shtëpisë së Bardhë ka deklaruar se Trump ka pyetur stafin për të dy kandidatët gjatë një fluturimi me Marine One në fund të muajit të kaluar.

Një këshilltar i presidentit ka thënë se Trump beson privatisht se Vance duhet të udhëheqë Partinë Republikane pas tij, por se është ende herët për të përcaktuar momentin kur zëvendëspresidenti do të shpallë kandidaturën ose kur Trump do të japë një mbështetje publike.

Megjithatë, disa aleatë dhe këshilltarë të tjerë të Trump kanë shprehur dyshime se presidenti e ka marrë përfundimisht vendimin për Vance. Sipas tyre, Trump shpesh u përcjell mesazhe të ndryshme personave të ndryshëm dhe mund të ndryshojë qëndrim në të ardhmen.

Ndërkohë, JD Vance nuk ka bërë të ditura planet e tij për vitin 2028. Persona pranë tij kanë deklaruar se ai ende nuk ka marrë një vendim dhe se mund të presë deri pas lindjes së fëmijës së tij të katërt përpara se të përcaktojë hapat e ardhshëm politikë.

Në të njëjtën kohë, Trump vijon të vlerësojë Marco Rubion, duke e parë edhe si një kandidat të mundshëm për një rol në një garë të përbashkët me Vance, megjithëse nuk është e qartë nëse Rubio do ta pranonte një pozicion të tillë.