Shtatë oficerë policie mbetën të plagosur mëngjesin e kësaj të hëne gjatë një përleshjeje të armatosur me militantë të dyshuar të Shtetit Islamik (ISIS) në provincën veriperëndimore të Turqisë, Yalova, raportoi transmetuesi shtetëror TRT Haber.

Sipas raportimeve, incidenti ndodhi gjatë një operacioni policor, kur forcat e sigurisë kryen një bastisje në një banesë ku ndodheshin persona të dyshuar për lidhje me organizatën terroriste. Të dyshuarit iu përgjigjën thirrjeve për dorëzim duke hapur zjarr ndaj policisë, çka solli një shkëmbim të ashpër armësh.

Operacioni po zhvillohet me masa të shtuara sigurie dhe po mbështetet edhe nga njësi të policisë së operacioneve speciale të ardhura nga provinca fqinje Bursa. Forcat e rendit kanë rrethuar zonën dhe po vijojnë kontrollin për neutralizimin e plotë të situatës.

Autoritetet bënë me dije se shtatë efektivët e plagosur janë transportuar në spital dhe ndodhen jashtë rrezikut për jetën. Hetimet për rastin vijojnë, ndërsa nuk ka ende informacion zyrtar mbi numrin e personave të dyshuar apo nëse ka të arrestuar.