Departamenti i Policisë Kriminale ka finalizuar një tjetër operacion të suksesshëm ndërkombëtar, duke bërë të mundur arrestimin dhe deportimin drejt Shqipërisë të Kamer Duhanxhiut, 44 vjeç, i kërkuar prej vitit 1999 nga autoritetet italiane.

Sipas njoftimit zyrtar, FAST Albania e Forcës së Posaçme Operacionale, në bashkëpunim me Shërbimin Diplomatik të Sigurisë të SHBA-së, Zyrën e Hetimeve Kriminale në Ambasadën Amerikane në Tiranë, Drejtorinë Qendrore të Policisë Kriminale Italiane dhe ekspertët e sigurisë në Shqipëri, ka shkëmbyer informacion prej kohësh për lokalizimin e tij.

Duhanxhiu është dënuar në Itali me 30 vite burg për veprat “Vrasja”, mbetur në tentativë, dhe “Vrasja në rrethana cilësuese”, ngjarje që datojnë në vitin 1999 në qytetin e Asti-t. Ai ishte shpallur në kërkim ndërkombëtar dhe ndaj tij ishte lëshuar kartelë e kuqe nga Interpoli.

Pas një kërkimi shumëvjeçar, autoritetet amerikane, në bashkëpunim me agjencitë ligjzbatuese shqiptare dhe italiane, e arrestuan këtë vit në shtetin e Floridës, ku ai fshihej prej shumë vitesh.

Më 19 nëntor 2025, Duhanxhiu u deportua nga SHBA drejt Shqipërisë me fluturim çarter. Sapo mbërriti në aeroportin “Nënë Tereza”, ai u prangos nga Policia e Shtetit me qëllim ekstradimin e menjëhershëm drejt Italisë, ku e pret ekzekutimi i dënimit 30-vjeçar.

“Policia e Shtetit vë në dukje edhe një herë një operacion të suksesshëm në kuadër të bashkëpunimit ndërkombëtar ndërmjet agjencive partnere ligjzbatuese”, theksohet në njoftimin zyrtar.