Prishtinë – I dërguari i posaçëm i Bashkimit Evropian për dialogun Kosovë–Serbi, Peter Sorensen, bëri të ditur se vizita e tij njëditore në Kosovë u fokusua te avancimi i procesit të normalizimit të marrëdhënieve me Serbinë.

Sorensen zhvilloi takime të ndara me kryeministrin Albin Kurti dhe ministrin për Punë të Jashtme dhe Diasporë, Glauk Konjufca, ku diskutuan për zbatimin e zotimeve të mëparshme dhe për sigurimin e stabilitetit si pjesë e rrugës evropiane të Kosovës.

“Vizitova Kosovën për bisedime të mira me kryeministrin Kurti dhe ministrin e sapoemëruar të Jashtëm, Konjufca. U përqendruam në avancimin e normalizimit të raporteve me Serbinë, zbatimin e zotimeve dhe sigurimin e stabilitetit dhe progresit në rrugën evropiane,” shkroi Sorensen në X më 24 shkurt.

Vizita e tij vjen në një kohë kur dialogu mes dy vendeve mbetet thelbësor për perspektivën evropiane të Ballkanit Perëndimor.