Librazhd – Një rrëshqitje masive e tokës, e shkaktuar nga reshjet e dendura dhe erozioni lumor pranë lumit Shkumbin, ka bllokuar aksin strategjik Librazhd–Pogradec dhe bypassin e ri, duke vënë në vështirësi qarkullimin rrugor.

Në një konferencë për mediat, Zv. Ministri i Infrastrukturës dhe Energjisë, Ami Kozeli, së bashku me kreun e ARRSH dhe përfaqësues të AKMC, njoftuan masat emergjente për rikthimin e funksionalitetit të rrugës.

“Mbetet ndikimi i reshjeve intensive, erozioni lumor ka shkaktuar një rrëshqitje aktive masive. Po ndërhyjmë menjëherë për ndërtimin e një rruge alternative pranë hekurudhës, ndërkohë që rruga ekzistuese do të prishet dhe do të lehtësohet ngarkesa në zonën e rrëshqitjes,” tha Kozeli. Ai shtoi se do të disiplinohen rrjedhat sipërfaqësore për të parandaluar dëmtime të mëtejshme.

Autoritetet garantuan se aksi Librazhd–Prrenjas do të rikthehet në funksion të plotë sapo të sigurohet stabiliteti i terrenit, ndërsa deri atëherë këshillohet shmangia e qarkullimit të panevojshëm.

Situata ka shkaktuar shqetësim për banorët dhe transportin e mallrave, ndërsa institucionet punojnë pa ndërprerje për të parandaluar përkeqësimin e dëmeve.