Disa nga udhëheqësit e profilit të lartë të Antifa-s kanë lënë Shtetet e Bashkuara ose po planifikojnë arratisjen jashtë vendit, pas shpalljes nga presidenti Donald Trump të grupit si një kërcënim për terrorizëm të brendshëm dhe urdhrit për të çmontuar rrjetet e tij brenda SHBA.
Mark Bray, financues i operacioneve ndërkombëtare dhe ideolog i njohur i Antifa-s në Amerikë, është larguar drejt Spanjës, duke thënë se shqetësimet për sigurinë e kanë bërë të marrë këtë vendim. Ai mbetet aktiv akademikisht, duke dhënë mësim në distancë në Universitetin Rutgers, megjithë thirrjet për shkarkimin e tij nga studentët për mbështetje të dhunës së ekstremit të majtë. Libri i tij, Antifa: The Anti-Fascist Handbook, mbështet materialisht degët ndërkombëtare të Antifa-s përfshirë qindra grupe në SHBA.
Po ashtu, Caroline dhe Johan Victorin, themelues të Rose City Antifa në Portland, u zbuluan duke u fshehur në Varberg, Suedi, pas frikës nga ndjekja penale federale. Rose City Antifa, e konsideruar si një nga degët më radikale të Antifa-s në SHBA, është e lidhur me sulme ndaj kundërshtarëve politikë dhe pronës shtetërore, përfshirë publikimin e të dhënave personale të agjentëve të ICE.
Autoritetet amerikane po hetojnë lidhjet ndërkombëtare të Antifa-s dhe mund ta klasifikojnë si organizatë terroriste të huaj, ndërsa ndjekja penale për sponsorët e saj mund të çojë deri në 20 vjet burg dhe ngrirje të pasurive.
Pavarësisht kërcënimeve ligjore dhe akteve federale, grupet Antifa në SHBA dhe rrjeti Torch Anti-Fascist Network vazhdojnë të deklarojnë se veprimet e tyre janë të orientuara drejt luftës kundër “aktivitetit lokal fashist” dhe nuk marrin përgjegjësi për publikimet e dhunshme të të dhënave.
Kjo situatë shënon një përshkallëzim të tensionit midis qeverisë amerikane dhe grupeve të ekstremit të majtë, me disa udhëheqës që zgjedhin arratisjen jashtë vendit për të shmangur ndjekjet penale.
